- ESTÁ PRESENTE BAIXO O PARAUGAS DA XUNTA DE GALICIA, CUN ESPAZO NO STAND QUE A CONSELLERÍA DO MEDIO RURAL TEN NESTE CERTAME
- O SALÓN DE ALIMENTACIÓN DO ATLÁNTICO, QUE TENDRÁ LUGAR DO 2 AO 5 DE XUÑO, SEGUE APOSTANDO POLA SÚA PROMOCIÓN NOUTROS EVENTOS
A Feira Internacional de Galicia ABANCA continúa apostando pola presenza noutros eventos para dar a coñecer os seus certames, entre eles o Salón de Alimentación do Atlántico, Salimat Abanca.
Así, esta cita está a darse a coñecer entre os expositores e visitantes do salón Gourmets, o cal celebra a súa 35ª edición desde onte e ata o vindeiro xoves en Madrid.
A feira acode a este evento baixo o paraugas da Xunta de Galicia, dispoñendo dun espazo no stand que a Consellería do Medio Rural ten neste certame e no que participan outras 28 empresas do sector agroalimentario. Unha presenza expositiva á que suman outras 18 entidades da cadea mar-industria no stand do que dispón a Consellería do Mar en Gourmets.
No seu espazo, Salimat Abanca, está a dar a coñecer a súa 25ª edición, a cal volverá converterse en punto de encontro do sector alimentario e gastronómico a través dunha atractiva exposición e unha ampla programación na que destacarán os Encontros Internacionais de Compradores, ademais de showcookings, catas, presentacións e o seu espazo de innovación Alinova. Celebrarase do 2 ao 5 de xuño no marco da 44ª Feira Internacional Abanca Semana Verde de Galicia.
Ademais, en Gourmets está presente un equipo da Feira Internacional de Galicia ABANCA, de novo encabezado polo seu director, Ricardo Durán, o cal non só atende aos visitantes, senón que está a realizar visitas a moitos dos expositores presentes para darlles a coñecer a próxima edición deste salón.
Notable difusión
A pouco máis dun mes para a súa celebración, Salimat Abanca está a realizar unha importante promoción da súa vindeira cita, a cal ademais desta presenza en Gourmets inclúe tanto soportes propios da Feira Internacional de Galicia ABANCA como medios enmarcados no sector alimentario.
